Айзада Канатбекованы издөөгө 200дөн ашык милиция кызматкери тартылганы айтылды

Маркум Айзада Канатбекованы издөөгө 200дөн ашык милиция кызматкери тартылган. Бул тууралуу бүгүн, 8-апрелде Жогорку Кеңештин жыйынында Бишкек ШИИББдин жетекчиси Бакыт Матмусаев билдирди.

Матмусаевдин айтымында, ыкчам иликтөө иштерине Бишкек ШИИБдин борбордук аппаратынын 150дөй, Биринчи Май райондук милициянын 60тай кызматкери тартылган.

Ал депутаттардын суроолоруна жооп берип жатып бул окуя боюнча милиция кызматкерлеринин ишин шалаакылык деп эсептебей турганын билдирди. "Биздин кызматкерлер түнү-күнү, үйлөрүнө барбастан, кийимдерин алмаштырбай иштеп жатышат. Бүт күч-аракеттерди жасадык", - деди ал.

Окуянын чоо-жайы:

5-апрелде 3 адам 27 жаштагы Айзада Канатбекованы ала качып кетишкени белгилүү болгон. 7-апрелде Бишкек ШИИББи Канатбекованын жана аны ала качууга шектелгендердин биринин жансыз денеси унаадан табылганын билдирди. Ала качууга шектелгендердин бири 1992-жылы туулган Р.А. кармалып, Бишкек ШИИББинин убактылуу кармоочу жайына киргизилди.

Каза болгон кыз менен жигиттин сөөгүнө экспертиза дайындалды. Кийинчерээк Бишкек ШИИББинин жетекчилиги маалымат жыйын өткөрүп, Айзаданын өлүмүнө шектелген жаран 6 жылдан ашык түрмөгө отуруп чыкканын, үй-бүлөсү бар экенин маалымдады.

Бул окуядан кийин милиция кызматкерлеринин ишине нааразы болгон эл ИИМдин алдына митингге чыгышып, ички иштер министринин отставкасын талап кылышты.

Бүгүн, 8-апрелде Айзаданын сөөгү Балыкчы шаарында жерге берилет.