Замирбек Теңизбаевдин сөөгүн туугандары өлүкканадан алып кетишкен

Бишкектеги өлүкканадан Айзада Канатбекованы ала качып барып аны муунтуп өлтүрүп, андан соң өзүн өлтүргөнгө шектелип жаткан Замирбек Теңизбаевдин сөөгүн кечээ, 8-апрелде туугандары алып кетишкен. Бул тууралуу SUPER.KG порталы өлүккананын кызматкерлери билдиришти.

Кызматкерлер сөөктү туугандары кайда алып кетишкен белгисиз экенин айтышты.

Окуянын чоо-жайы:

5-апрелде 3 адам 27 жаштагы Айзада Канатбекованы ала качып кетишкени белгилүү болгон. 7-апрелде Бишкек ШИИББи Канатбекованын жана аны ала качууга шектелгендердин биринин жансыз денеси унаадан табылганын билдирди. Ала качууга шектелгендердин бири 1992-жылы туулган Р.А. кармалып, Бишкек ШИИББинин убактылуу кармоочу жайына киргизилди.

Каза болгон кыз менен жигиттин сөөгүнө экспертиза дайындалды. Кийинчерээк Бишкек ШИИББинин жетекчилиги маалымат жыйын өткөрүп, Айзаданын өлүмүнө шектелген жаран 6 жылдан ашык түрмөгө отуруп чыкканын, үй-бүлөсү бар экенин маалымдады.

Бул окуядан кийин милиция кызматкерлеринин ишине нааразы болгон эл ИИМдин алдына митингге чыгышып, ички иштер министринин отставкасын талап кылышты.

8-апрелде Айзаданын сөөгү Балыкчы шаарында жерге берилди.

Бишкек ШИИББинин маалымат кызматынан Айзаданын өлүмүнө шектүү жаран Орусиянын аймагында 3 ирет соттолгонун кабарлады. Кийинчерээк ала качууга катыштыгы бар делинген экинчи шектүү, андан кийин үчүнчү, төртүнчү шектүүлөр кармалышканы белгилүү болду.