Бишкек ШИИББи: "Шайлоонун жүрүшүндө 42 мыйзам бузуу катталды"

Бишкек шаарынын ички иштер башкы башкармалыгы референдумду жана жергиликтүү кеңештердин депутаттарын шайлоону даярдоонун жана өткөрүүнүн жүрүшүндө жалпы 42 мыйзам бузууну каттады. Бул тууралуу Бишкек ШИИББинин басма сөз кызматынан кабарлашты.

Маалыматка ылайык, Кылмыш-жаза кодексинин 192-беренеси (Шайлоочулардын добушун сатып алуу) боюнча 2 кылмыш, 87-1-беренеси (Административдик ресурстарды пайдалануу) боюнча 1 жосунсуз жорук, 5 мыйзам бузуунун ичинен төртөө 42-берене (Шайлоочунун укуктарын бузуу) жана 81-берене (Баңги каражаттарын же психотроптук заттарды колдонуу, коомдук жайларда спирт ичимдиктерин ичүү) боюнча мыйзам бузуулар катталган.

Ошондой эле Бишкек шаарынын ички иштер органдарынын маалыматтарды каттоо журналына 34 факты катталып, өндүрүш иштери жүргүзүлгөн. Бул боюнча мыйзам бузуулар аныкталган эмес.