Маданият министри Кайрат Иманалиев Түрк кеңешинин баш катчысы менен жолукту

Маданият, маалымат, спорт жана жаштар саясаты министри Кайрат Иманалиев Баку шаарында өткөн министрлердин маалымат жаатындагы жогорку ыйгарым укуктуу өкүлдөрүнүн 3-жолку отурумунун алкагында Түрк кеңешинин баш катчысы Багдат Амреев менен жолукту. Бул тууралуу министрликтен кабарлашты.

Билдирүүдө жазылгандай, эки тараптуу жолугушууда IV Дүйнөлүк көчмөндөр оюндарынын уюштуруу иштериндеги маселелер кеңири талкууланды. Дүйнөлүк маанидеги мындай иш-чаранын жалпы Түрк дүйнөсү үчүн маанилүүлүгү белгиленип, анын мындан аркы келечегинде бардык тараптар кызыкдар экени айтылды.

Мындан сырткары маалымат жаатындагы демилгелер тууралуу сөз болуп, Түрк дүйнөсүнүн орток телеканалын ачуу маселеси каралып, анын маданий, саясий жана социалдык-экономикалык маанидеги алмашкыс аянтча болуп берери ырасталып, ар тараптуу колдоого алынды.

Жолугушуунун соңунда баш катчы мындан аркы тыгыз кызматташууда натыйжалуу ийгиликтерди каалап, аталган иш-чарага катышып бергендиги үчүн министр башында турган жалпы кыргыз делегациясына ыраазычылык билдирди.

Отурумдан кийин катышуучулар Азербайжан Республикасынын улуттук лидери Гейдар Алиевдин бейитине барып, эстелигине гүл коюшту. Андан соң министр Кайрат Иманалиев Гейдар Алиевдин музейи менен таанышып чыкты.