Издөө салынат! Чүйдө 17 жаштагы Рахат Тыныбекова изделүүдө

Сокулук районунун милициясы дайынсыз болуп жаткан 17 жаштагы Рахат Тыныбековага издөө салат. Бул тууралуу Чүй ОИИББинин басма сөз кызматынан билдиришти.

Маалыматка ылайык, дайынсыз болуп жаткан Рахат Тыныбекова 2004-жылы туулган. Сокулук РИИБине облустук эмгек жана социалдык өнүгүү башкармалыгынын өкүлдөрү кайрылышкан. Алар Гавриловка айылында туугандары менен жашаган Рахат Тыныбекова 2020-жылы 14-октябрда үйдөн чыгып кетип, ушул күнгө чейин кайтып келе электигин айтышкан.

Аталган факты Кылмыштардын жана жоруктардын бирдиктүү реестрине катталып, сотко чейинки өндүрүш иши башталган.

Рахат Тыныбекова Ош облусунун Өзгөн районунда туулган. Чоң атасынын колунда тарбияланган. Ал апасы каза болуп калган. 2020-жылдын декабрь айында туугандары менен байланышып, ал жерден анын тынчын албоону өтүнгөн.

Мындан тышкары, туугандарынын айтымында, 2021-жылы февраль айында изделип жаткан кыз Ош облусуна барып, андан кийин Бишкек шаарына кайтып келген. Такталбаган маалымат боюнча, дайынсыз болуп жаткан кыз турмушка чыгып бала төрөгөн.

Милиция изделип жаткан өспүрүм тууралуу маалымат билгендер болсо, төмөнкү номурларга кайрылып коюуну өтүнөт: 0312607567, 0313453357, 0558861486, 0709353529.