"Үйдөн кача баштаган". Чүйдө 15 жашар бала февраль айынан бери дайынсыз болуп изделүүдө

Чүй облусунун Панфилов районунда 2006-жылы туулган Адилет Данияров аттуу бала дайынсыз болуп изделүүдө. Бул тууралуу облустук милициянын маалымат кызматынан билдиришти.

Маалыматка ылайык, 8-апрель күнү Панфилов РИИБине 1985-жылы туулган келин арыз менен кайрылган. Анда ал 15 жаштагы баласы 20-февралда Кум-Арык айылындагы үйдөн чыгып кеткен бойдон кайрылып келбегенин жазган.

Бул факты Кылмыштардын жана жоруктардын бирдиктүү реестрине катталып, издөө иштери башталган.

"Арыз ээси менен сүйлөшүү учурунда өспүрүм бала Ысык-Көл облусунда туулуп өскөнү белгилүү болгон. Апасынын айтымында, ал 5-класстан баштап мектепке барбай, үйдөн кача баштаган. Кийинчерээк жумалап же айлап жоголуп кеткенин билдирген. Ушул себептүү апасы арызды убагында жазган эмес", - деп билдиришти Чүй ОИИББинин маалымат кызматынан.

Белгилери: Бою 160-165 сантиметр, чачы кара, арык чырай, башынын сол жагында тырык бар.

Кийген кийими: Кара түстөгү күрмө, кара түстөгү спорттук шым, бутуна кара түстөгү бут кийим.

Милиция сүрөттөгү баланы көргөн, билгендер болсо, төмөнкү номерлерге кайрылууну суранат: 0312 6079 89, 0702 31 75 22, 0557 08 03 87, 0701 79 0018.