Жогорку Кеңештин төрагасы Азербайжан Милли Межлисинин төрайымы менен байланышты өнүктүрүү маселеси тууралуу сүйлөшүштү

Бүгүн, 15-апрелде Санкт-Петербург шаарында өтүп жаткан Көз карандысыз мамлекеттер шериктештигине мүчө өлкөлөрдүн Парламенттер аралык ассамблея кеңешинин жыйынынын алкагында Жогорку Кеңештин төрагасы Талант Мамытов менен Азербайжан Республикасынын Милли Межлисинин төрайымы Сахиба Гафарова жолугушту. Бул тууралуу парламенттин басма сөз кызматынан билдиришти.

Жолугушууда боордош эки мамлекеттин байланыштарынын келечеги, анын ичинен саясий-экономикалык, маданий-гуманитардык алакаларды өнүктүрүү маселелери талкууланды.

Талант Мамытов менен Сахиба Гафарова соода-экономикалык байланыштарда жылыштар бар экенин белгилешип, бирок эки өлкөнүн ортосундагы соода жүгүртүүнүн көлөмү мүмкүнчүлүктөргө карабай төмөн экендигин кошумчалашты.

Андан тышкары боордош эки элдин мамилесин чыңдоого өбөлгө болчу парламенттер аралык өнөктөштүктү да өнүктүрүү зарылчылыгына токтолушту.