Жогорку Кеңештин делегациясы КМШ парламенттер аралык ассамблеясынын кеңешинин отурумуна катышты

Жогорку Кеңештин төрагасы Талант Мамытов баштаган Жогорку Кеңештин делегациясы Санкт-Петербург шаарында өтүп жаткан Көз карандысыз мамлекеттер шериктештигине мүчө өлкөлөрдүн парламенттер аралык ассамблеясынын кеңешинин отурумуна катышты. Бул тууралуу парламенттин басма сөз кызматынан билдиришти.

Отурумда кеңештин мүчөлөрү 2021-жылдын 16-апрелинде өтө турган КМШ парламенттер аралык ассамблеясынын кеңешинин 52-пленардык жыйынынын күн тартибинин долбоорун талкуулашты.

Күн тартибиндеги негизги маселе шериктеш өлкөлөрдөгү шайлоолорго жана референдумга байкоо салууну уюштуруу тууралуу болуп, анын ичинен Кыргыз Республикасында мөөнөтүнөн мурда өткөн президенттик шайлоого, башкаруу формасын аныктоо жана Конституциянын жаңы долбоору боюнча уюштурулган референдумдарга аталган ассамблеясынын эл аралык байкоочулардын катышуусуна байланышкан маалыматтар айтылды.

Тагыраагы, КМШ ПААнын байкоочулары Кыргыз Республикасында өткөн добуш берүү жараяндары улуттук мыйзамдарга жана демократиялуу шайлоолорду өткөрүү боюнча эл аралык стандарттарга шайкеш келгендигин белгилеген корутундуга келишти.

Өз кезегинде төрага Талант Мамытов шайлоо өнөктүктөрүнө жигердүү байкоо салганы үчүн КМШ парламенттер аралык ассамблеясынын кеңешинин эл аралык байкоочуларына ыраазычылык билдирди. Парламенттер аралык ассамблеянын бул жааттагы тажрыйбасынын маанилүү экенине токтолду.