Бишкекте медицина кызматкерлери тынчтык митингине чыгышты

Бүгүн, 16-апрелде Бишкектеги Панфилов сейил багына медицина кызматкерлери тынчтык митингине чыгышты.

Анда медицина кызматкерлери бийликтен бир жолку төлөнүүчү кенемтени берүүнү, медицина кызматкерлеринин айлык маянасын заманга ылайык көтөрүп берүүнү, профсоюздан баш тартуу жана аны ликвидациялоону талап кылышууда.

Атын, иштеген жерин атагысы келбеген үй-бүлөлүк дарыгер төмөнкүлөрдү айтып берди.

“Компенсация бир жыл болуп калды төлөнө элек. Ошондон бери эч ким төлөгөн жок, айтпайт. Документтерибиздин баарын тапшырып койгонбуз. Саламаттыкты сактоо министрлигинде жатат. Былтыр июль айында коронавирус болуп ооруп калгам. Мобилдик бригадада иштегем.

Андан сырткары айлык акы эки эсе көбөйдү дешти, бирок чын-чынына келгенде үй-бүлөлүк дарыгерлердин айлыгы кайра азайды. Себеби дегенде биз баллдык систем менен иштечүбүз. Колубузга 20-21 миң айлык алчубуз. Азыр болсо колубузга 12 миңдей тийип калат окшойт”, - деди дарыгер.

Учурда алар сейил бактан Ак Үйдү көздөй бет алышты.