Жарандык активист саламаттыкты сактоо министринин кызматтан кетишин талап кылып, жалгыз нааразычылык акциясына чыкты

Бүгүн, 20-апрелде жарандык активист Өндүрүш Токтонасыров саламаттыкты сактоо министри Алымкадыр Бейшеналиевдин кызматтан кетишин талап кылып, өзү жалгыз нааразычылык акциясына чыкты. Бул тууралуу ал өзүнүн Фейсбуктагы баракчасы аркылуу билдирди.

Активисттин айтымында, ал "Арманың болсо аконитке айт" деген жазуусу бар, уу коргошундун сүрөтү тартылган плакатты көтөрүп чыгып, аны министрликтин имаратына таштай кеткен.

"Саламаттыкты сактоо министри клиникалык изилдөөдөн өтпөгөн уу коргошунду коронавирус менен ооругандарга айтпай, дебей бергени өз элине жасаган чыккынчылыгы. Адамзатка каршы чоң кылмыш. Кошоматчыбы же болгон деңгээли ушулбу, өтө таң калычтуу адам экен. Бул акылсыз кадамы менен тарыхка, бай тажрыйбага ээ кадырлуу кыргыз медицинасынын баркын түшүрдү. Ал ар нерсени божурап, креслого чаптап койгонсуп отура бербей, тезинен кызматтан кетүүгө тийиш. Ушул талаптар менен жаңы эле ал жакта болдум. Алымкадыр чыккан жок. Кызматкери аркылуу "кагаз жүзүндө жазып калтырсын, 14 күндөн кийин жооп берем" деп жооп берди. Мына сага бюрократия.

Министр акция деген эмне, кат жүзүндө кайрылуу деген эмне экенин да билбейт окшобойбу. Чыкса болмок, каадаланбай же коркпой эле. Мен ага уу коргошун бербейт элем. Кудай сактасын, тескерисинче, уу коргошундун татынакай гүлү тартылган сүрөттү эстеликке берип, болбой калдыңыз кетиңиз деп айтмакмын. Баса, ошол плакатка талапты жазып босогодогу чоң ящикке салып койдум. Жооп күтөм", - деп жазган Өндүрүш Токтонасыров.