Шаар күнү жана Улуу Жеңиш күнүнө карата майрамдык иш-чаралар өткөрүлбөйт

Жарандардын коопсуздугу үчүн 29-апрель шаар күнүнө жана 9-Май Жеңиш күнүнө карата массалык иш-чараларды өткөрбөө чечими кабыл алынды. Бул тууралуу мэриянын басма сөз кызматынан билдиришти.

Маалыматка ылайык, борбор калаада эпидемиологиялык кырдаал курч бойдон калууда, Бишкек шаарында коронавирус пандемиясынын бардык мезгилинде катталган коронавирус инфекциясы жана пневмония менен ооругандардын саны 32 миң 649 түзүп, анын ичинде 20-апрелге карата 117 жаңы учур катталган.

"Урматтуу жарандар! Ар бириңизден санитардык нормаларды сактоону чын жүрөктөн суранабыз: беткап кийип, жеке гигиенаны бекемдеңиз, колуңузга антисептикти системалуу түрдө чачыңыз, эң башкысы коомдук жайларга барууну чектеңиз, аралыкты сактаңыз. Өзүңүзгө жана жакындарыңызга кам көрүңүз", - деп айтылат маалыматта.