Ысык-Ата районунда каракчылык жана зордуктоо кылмышына шектүү жаран кармалды

Ысык-Ата районунда каракчылык жана зордуктоо кылмышына шектүү Бишкек шаарынын тургуну кармалды. Бул тууралуу бүгүн, 18-октябрь күнү Чүй ОИИБинин басма сөз кызматы билдирди. Маалымат боюнча, 24-сентябрь күнү Ысык-Ата РИИБинин нөөмөт бөлүмүнө белгисиз адам жергиликтүү тургундун үйүнө кирип, күч колдонуп зордуктап кеткени кабарланган. Билдирүү түшкөн жерге барган милиция кызматкерлери 25 жаштагы Ново-Покровка айылынын тургуну уктап жаткан учурда үйүнө медициналык чүмбөтчөн 30-35 жаштагы белгисиз адам кирип, бычак менен коркутуп зордуктап, 30 миң сом акчасын алып кеткенин аныкташкан. Жабырлануучунун көрсөтмөлөрү боюнча Ысык-Ата РИИБинин кызматкерлери тарабынан аталган кылмышка шектелип 32 жаштагы Бишкек шаарынын тургуну кармалды. Учурда кармалган жаран убактылуу кармоочу жайга киргизилип, тергөө иштери уланууда.