"Бейтаптар узак убакыт бою кайнатманы дары катары ичип жүрүшкөн". Уу коргошунга уулангандар боюнча министрлик маалымат таратты

Буга чейин уу коргошундан бир аял менен бир киши ууланганы өздүк булактар тарабынан белгилүү болгон. Бирок уулангандар боюнча Саламаттыкты сактоо жана социалдык өнүктүрүү министрлигинен маалымат алуу мүмкүн болбой жаткан.

Саат 18:50гө карата министрликтен уу коргошундан уулангандар боюнча билдирүү таратты.

"20-апрелде Бишкектеги Травматология жана ортопедия илим изилдөө борборуна оор абалда бир үй-бүлө мүчөлөрү (1950-жылы туулган О.К., 1955-жылы туулган С.Т.) кайрылган. Аларга алдын ала "аконит менен уулануу, ритмогендик шок" диагнозу коюлган. Бейтаптардын айтымында, алар узак убакыт бою кайнатманы дары-дармек катары ичип жүрүшкөн. Аялда шишик пайда болгондугуна байланыштуу бир күн мурда кайнатманын өлчөмүн көбөйткөн. Бейтаптарга тиешелүү жардам көрсөтүлгөндөн кийин жүрөк-кан тамырдын иши калыбына келип, жабыркагандардын абалы турукташты. Учурда интенсивдүү дарылануудан өтүп жатышат", - дешти министрликтен.