Ош ШИИБи: "Өспүрүмдөр жарамазан айтууну тилемчиликтин жаӊы формасына айлантып алышты"

Ош шаардык ички иштер башкармалыгынын кызматкерлери тарабынан өспүрүмдөрдүн арасындагы кылмыштуулуктун алдын алууга багытталган кезектеги рейддик иш-чара өткөрүлдү. Иш-чара 4 күнгө созулуп, анда 77 өспүрүм түн ичинде кароосуз жүргөндүгү аныкталды.

Ош ШИИБинин басма сөз кызматынан кабарлашкандай, кароосуз жүргөн балдардын ичинен 42 өспүрүмгө түшүндүрүү иштери жүргүзүлгөндөн кийин ата-энесине өткөрүлүп берилген. Ал эми жакындары издеп келбеген 32 өспүрүм Оштогу балдардын реабилитациялоо борборуна жеткирилди. 3 бала-социалдык жактан коргоо кызматтарына өткөрүлүп берилди.

Мындан тышкары турмуштук оор шарттарда жашаганы аныкталган 24 баланы кароо үчүн Ош шаардык балдар комиссиясына тиешелүү кагаздар жөнөтүлдү.

"Рейддин жүрүшүндө көчөлөрдө түнкү саат 22:00дөн кийин дагы жарамазан айтып жүргөн балдар кармалып, аларга түшүндүрүү, коопсуздук чаралары боюнча эскертүүлөр берилди. Жарамазан айткан балдардын көбү жол бойлой өз өмүрлөрүн тобокелге салышып, тамактануучу жайларга кирип, тамактанган адамдарга жолтоо болуп жатышат. Учурда жол бойлоп жарамазан айтуу тилемчилик кылуудан айырмасы болбой жатат. Жарамазандын тереӊ философиялык маанисине түшүнүшпөй, төрт сап менен жарамазан айтып жүрүшөт. Учурдан пайдаланып Ош ШИИБи жашы жете элек балдарды жарамазан айтып чыгуусуна тыюу салууну суранат", - деп айтылат мекеменин билдирүүсүндө.