Улукбек Марипов Мария Айтматованын дүйнөдөн кайткандыгына байланыштуу көңүл айтты

Премьер-министр Улукбек Марипов улуу жазуучу Чыңгыз Айтматовдун жубайы Мария Айтматованын дүйнөдөн кайткандыгына байланыштуу анын үй-бүлөсүнө, жакындарына жана туугандарына өзүнүн жана өкмөттүн атынан көңүл айтты.

Марипов Фейсбуктагы баракчасында белгилегендей, Мария Айтматова кыргыз адабиятынын "алтын" дооруна түздөн-түз тиешеси бар адамдардын бири болчу.

"Мария Урматовнанын жөнөкөйлүгүнө жараша Айтматовдордун үй-бүлөсүндө узак жылдар бою үй-бүлөлүк очогу кармалып, меймандостукка жана берекеге толуп турган. Кыргыз адабиятынын "алтын" дооруна түздөн-түз тиешеси бар, аттары дүйнөлүк тарыхка жазылып калган биздин замандаштарыбызды жакындан билген адамдар бизди таштап кетип жаткандыгы кайгылуу. Мария Урматовнанын жаркын элеси ар дайым жүрөгүбүздүн тереңинде сакталат. Орду толгус жана мезгилсиз жоготуу кайгысын тең бөлүшөбүз", - деп жазды премьер-министр Улукбек Марипов .

Мария Айтматованы акыркы сапарга узатуу зыйнатынан түз эфирди шилтеме аркылуу өтүп, көрсөңүз болот.