Жомок окуп берди. Билим берүү министри көзү азиздер мектеп-интернатындагы балдардан кабар алганы барды

Билим берүү жана илим министрлиги Бүткүл дүйнөлүк китеп жана автордук укук күнүнө арналган "Балдарга окуп беребиз" акциясын баштады. Бул тууралуу SUPER.KG порталына билим берүү жана илим министринин жардамчысы Илгиз Султан билдирди.

Бул акциянын алкагында бүгүн билим берүү жана илим министри Алмазбек Бейшеналиев Бишкек шаарындагы көзү азиз жана начар көргөн балдар үчүн атайын жалпы билим берүүчү мектеп-интернатка барып, анын жамааты менен баарлашты. Андан соң ал мектеп-интернатта тарбияланып жаткан балдарга "Таттуу алма" жомогун окуп берип, колдон колго өтүп саякаттай турган балдар адабияты салынган баштыкча жана ноутбук белек кылды.

Белгилей кетсек, аталган мектеп-интернатта республиканын бардык аймактарынан келген 222 окуучу билим алууда. Алардын ичинен 123 окуучу – Брайл системи боюнча окуп жаткан көзү начар көргөндөр, 99 окуучу – көзү азиздер.