Камчыбек Ташиев: "Чечме булагын азырынча чогуу колдонобуз"

Бүгүн, 25-апрелде Улуттук коопсуздук боюнча мамлекеттик комитетинин төрагасы Камчыбек Ташиев Өзгөн районунун тургундары менен жолугушуп, чек ара маселелери боюнча Өзбекстан менен кабыл алган чечимдер боюнча маалымат берүүдө.

Анда Камчыбек Ташиев Чечме булагы боюнча түшүндүрмө берди.

"Чечме боюнча, былтыр Чечме булагында жаңжал чыгып, эл кагылышкан. Чечмени мен барып көрдүм. Чечме 2 сотых жерде турат экен. Чечмеден чыккан суунун 80 пайызы Өзбекстанга агып кетет экен. Бул 2 эле сотых жер. Бирок анын баалуулугу Чечменин тегерегинде ата-бабаларыбыздын мүрзөсү бар экен. Булак кылымдардан бери бизге карап келген. Акыркы 20-30-жылда Чечменин тегерегин башка өлкөнүн жарандары ээлеп алышыптыр. Ошондуктан алар дагы сурады, биз дагы сурадык. Чечме боюнча бир чечимге келе алган жокпуз. Бирок акыркы маалдарда, буюрса, Чечмени чечебиз деген үмүт пайда болду. Чечмени азырынча чогуу колдонобуз деп гана калтырып койдук", - деди Ташиев.