Камчыбек Ташиевдин 15 жаштагы футболчу уулу 2 жарым миллион сомго үч эмдүү үй-бүлөгө үй алып берди

Улуттук коопсуздук боюнча мамлекеттик комитетинин төрагасы Камчыбек Ташиевдин үч уулу чет жерде үй алам деп иштеп жүргөн үч эмдүү үй-бүлөгө үй алып беришти. Бул тууралуу УКМКнын башчысы бүгүн, 25-апрелде Өзгөн эли менен жолугушуу учурунда айтты.

"Мен жөнүндө ар түрдүү ушактар тарап жатат. Бир апта мурун Ташиев Дубайдан үй алыптыр дейт. Урматтуу эл журт, жалпыңыздар угуңуздар. Ооба, мен үй алдым. Кайсы үйдү алдым? Орозо башталгандан 3-4 күндөн кийин Испаниянын "Леванте" клубунда ойногон 15 жашар уулум (ред. Эмир-Хан Кыдыршаев) чалды. Ата, Томас (ред. Таймурас Ташиев) агам барат агама жардам берип коюуңузчу деди. Эмне болуп кетти деп сарсанаа болдум. Улуу балам 2 саатта эле келди. Эмне болду балам десем, үйү жок Орусияда иштеп жүргөн жараныбыз үч эмдүү болуптур. Ата мен инилерим менен акча топтоп, ошол адамга үй алып берели дегенбиз, акчабыз жетпей жатат, жардам бериңиз деди.

Макул, жардам берейин дедим. Уулум ошол адам менен Орусияга чалып байланышыптыр. Макул деп мен жардам бердим. 2 жарым миллион сомго үч эмдүү үй-бүлөгө Жалал-Абад шаарынын Ынтымак участкасынан үй алып беришти. Ушул үйдү айтып жатышса керек. Башка менин эч жерде, чет өлкөдө бир дагы кирпичим жок", - деди Ташиев.