НДПК партиясы БШКнын чечимине каршы сотко арыз даярдап жатат

НДПК партиясы БШКнын чечимине каршы сотко арыз даярдап жатат. Бул тууралуу саясий партиянын лидери Илим Карыпбековго байланышканыбызда белгилүү болду.

Анын айтымында, БШК үч күндүн ичинде партиянын арызын карашы керек болчу.

"Негизи бүгүн акыркы күн, биз буга чейин күттүк. Мындан улам сотко кайрылууга туура келди. Кечке чейин жооп алсак алдык, болбосо чыныгы кайрылууга туура келет, бизде арыз даяр", - деди ал.

Борбордук шайлоо комиссиясы 18-апрелдеги жыйында НДПК партиясын шайлоодон четтетүү тууралуу чечим кабыл алган. Анда мекеме партия добуш сатып алган деген негизди жүйөө келтирген.

11-апрелде Кыргыз өлкөсү 28 шаардык жана 420 айылдык кеңештердин депутаттарын шайлоо жана жаңы Конституциянын долбоорун кабыл алуу боюнча референдум өткөргөн. Алдын ала маалыматтар боюнча, Бишкек шаардык кеңешине алты партия, Ошко төрт партия алдыга озуп чыккан.

Шайлоонун расмий жыйынтыгы 2-майга чейин чыгарылышы керек.