Кыргыз тарап Лейлекте уурдалган эки жаран боюнча Тажикстанга нота тапшырды

Бүгүн, 26-апрелде тышкы иштер министринин биринчи орун басары Нуран Ниязалиев Тажикстан Республикасынын Кыргыз Республикасындагы Атайын жана ыйгарым укуктуу элчиси Назирмад Ализода менен жолугушту.

Жолугушуу учурунда Тышкы иштер министрлиги тарабынан Тажикстандын элчисине Баткен облусунун Лейлек районундагы Кыргыз өлкөсүнүн 2 жаранын уурдоого байланыштуу укукка каршы жана мыйзамсыз иш-аракеттери боюнча кыргыз тараптын тынчсыздануусу жөнүндө нота берилген.

Сүйлөшүүнүн жүрүшүндө Ниязалиев чек арага жакын аймактардагы кырдаалды курчутууга алып келе турган мындай иш-аракеттерге жол бербөө зарыл экендигин белгилеген.

"Кыргыз тарабы болуп өткөн окуянын жагдайларын тактоо, күнөөлүү адамдарды жоопкерчиликке тартуу жана жыйынтыгын маалымдоо боюнча токтоосуз чараларды көрүүгө тажик тарапты чакырды.

Ниязалиев учурдагы бардык көйгөйлөр ынак коңшулук нугунда диалог жана сүйлөшүүлөр аркылуу чечилиши керектигин баса белгиледи.

Кыргыз тарап мурдагыдай эле тажик тарап менен биргеликте чек ара аймактарында Кыргыз өлкөсү жана Тажикстан боордош элдеринин көп жылдык руханий жана маданий мамилелеринин тарыхына негизделген ынак коңшулукту, туруктуулукту жана достукту камсыздоого багытталган шарттарды түзүүгө даяр экендигин Ниязалиев белгилеп өттү", - деп айтылат маалыматта.