Артём Новиковду рэпер рэп баттлга чакырды. Буга Новиков жооп берди

Gokilla каймана аты менен таанылган кыргыз рэпери Артур Исмаилов YouTube каналдардын бирине берген маегинде биринчи вице-премьер-министр Артём Новиковду рэп баттлга чакырды.

"Новиков, мен сизди Бишкекте рэп баттлга чакырам. Эки куплеттен турган 16 сап. Колуңуздан эмне келерин көрсөтүңүз. Саясат жөнүндө сүйлөшөлү. Сизди күтүп жатабыз", - деген рэпер.

Көп убакыт өтпөй эле буга биринчи вице-премьер социалдык тармактагы баракчасы аркылуу жооп берди. Анда Новиков рэпер менен поэзия жөнүндө маектешүүгө чакырган.

"Урматтуу MC Gokilla! Сени рэп баттлга кабыл алууга шарт болбой жатат, пандемияны жеңгенден кийин сени менен поэзия жөнүндө маектешебиз. Сен айткан рэптин башаты “Манас” эпосунан башталат. Андыктан сага ушул китеп белек болсун. Урматым менен Артём Новиков", - деп жазды ал.