Кыргызстандыктар улуттар аралык мамиленин учурдагы абалын орто деп баалашат

Кыргызстандын жарандары өлкөдөгү улуттар аралык мамиленин учурдагы абалына орто деген баа беришет. Муну КРнын Улуттук стратегиялык изилдөөлөр институтунун өкүлү Чолпон Чотаева 21-октябрда Бишкекте өткөн тегерек столдо айтты. Тегерек столдо улуттар аралык мамиле жана маалымат коопсуздугу талкууланып жатат. 

Эксперттин айтымында, 2012-жылы аталган институт атайын иликтөө жүргүзүп чыкты. Максаты - этникалык мамилелердин турукташуусу үчүн зарыл болгон факторлорду аныктоо. Изилдөөгө Ош облусу, Жалал-Абад, Чүй, Ысык-Көл облустары жана Бишкек шаарындагы 16 жаштан жогорку 1000 жаран катышыптыр. 

"Сурамжылоого катышкандардын көпчүлүгү улуттар аралык мамилелердин абалына орто деген баа беришти. Этникалык дискриминациянын негизги себептери деп социалдык экономикалык, тарыхый-маданий жана психологиялык көйгөйлөр аталды",- деди эксперт.