"Бизге таш бербей, автомат берсин. Биз өзүбүздү коргоп алабыз" деди митингге чыккандардын бири

Өкмөт үйүнүн алдына "Баткен, сен жалгыз эмессиң" аталышындагы митинг өтүп жатат. Анда тараптар өкмөт үйүнө жакын келүүгө аракет кылып жаткан. Бул арада митингге келгендер ой-пикири менен бөлүшүүдө.

"Урматтуу Садыр Жапаров бизге таш бербей, автомат берсин. Биз өзүбүздү коргоп алабыз. Кудайым бизге сууну берген. Аны эч кимге бербейбиз. Биздин ата-эне, туугандарыбыз уктай албай жатат. Армияны жөнөтсүн, бүгүн энелердин көз жашы токтосун", - деди митингге чыккандардын бири.

Учурда митингде чек арада жаралган курч абалды эл аралык деңгээлде билишсин деген максатта орус, анлис тилдеринде дагы түшүндүрүп жатышат.

Белгилей кетсек, Кыргыз-Тажик чек арасындагы абал кайрадан курчуду. Чек ара кызматынын маалыматына ылайык, алгач тажик жарандары эки өлкөнүн кесилишкен жеринен шагыл жүктөөгө аракет кылышса, кийинчерээк Головной суу алуучу жайына тажик чек арачылары көзөмөл камераларын орнотушкан. Буга нааразы болгон кыргыз тарап камераларды алып салууну талап кылып, ортодо эки тараптан чыр чыккан.

Баткен районунун жарандык коргонуунун башчысы, аким тарабынан Ак-Сай, Ак-Татыр, Самаркандек айыл аймактарына өзгөчө кырдаал режими киргизилди.