Өкмөт өкүлү: "Азыркы убакта күч органдарынын жетекчилеринин баары Баткенде"

Митингчилердин алдына дээрлик 3 сааттан кийин өкмөт аппаратынын жетекчисинин орун басары Айбек Жунушалиев чыкты.

"Баарыңарды сабырдуулукка чакырат элем. Бүгүнкү күндө таң атпай ыкчам штаб түзүлгөн. Президент Садыр Жапаров коопсуздук кеңешин өткөрүп, тийиштүү жетекчилерге тапшырмаларды берди. Азыркы убакта күч органдарынын жетекчилеринин баары Баткенде. Алар ишти көзөмөлдөөгө убакыт бергиле. Азыр эч ким бул жерге келип, маалымат бергенге убактысы жок.

Талаптар болсо азыр айтыңыздар", - деди өкмөт өкүлү.

Чогулгандар атышууну тез арада токтотуу талабын билдиришти.

Белгилей кетсек, Кыргыз-Тажик чек арасындагы абал кайрадан курчуду. Чек ара кызматынын маалыматына ылайык, алгач Тажик жарандары эки өлкөнүн кесилишкен жеринен шагыл жүктөөгө аракет кылышса, кийинчерээк Головной суу алуучу жайына тажик чек арачылары көзөмөл камераларын орнотушкан. Буга нааразы болгон кыргыз тарап камераларды алып салууну талап кылып, ортодо эки тараптан чыр чыккан.

Баткен районунун жарандык коргонуунун башчысы, аким тарабынан Ак-Сай, Ак-Татыр, Самаркандек айыл аймактарына өзгөчө кырдаал режими киргизилди.

Чек ара боюнча маанилүү маалыматтарды шилтеме аркылуу кирип окуй аласыз.