Ички иштер министринин биринчи орун басары Сүйүн Өмүрзаков Баткен облусуна барды

Ички иштер министринин биринчи орун басары Сүйүн Өмүрзаков Баткен ОИИБинин жана ИИМдин Ички аскерлеринин аскер бөлүгүнүн өздүк курамын түзүлгөн кырдаалды жөнгө салуу боюнча координациялоо үчүн Баткен облусуна барды. Бул тууралуу Ички иштер министрлигинин басма сөз кызматынан кабарлашты.

"Жеринде Баткен ОИИБинин начальниги, ИИМдин Ички аскерлеринин кол башчысы, андан сырткары облустук ички иштер башкармалыгынын өздүк курамы, ички аскерлердин курамы жана башка күч түзүмдөрү менен биргеликте коомдук тартипти күчөтүлгөн тартипте камсыздап жатышат. Милиция кызматкерлери тарабынан блокпосттор коюлуп, чек арага чектеш райондордогу жергиликтүү калкка түшүндүрүү иштери жүргүзүлүүдө", - деп билдиришти министрликтен.

Мындан тышкары жарандарды коопсуз райондорго жеткирүү иштери жүрүүдө. Абал чыңалуу бойдон калууда, бирок күч түзүмдөрү тарабынан көзөмөлдөнүүдө.