Жетөө аскер кызматкери... Бишкектеги 4-шаардык ооруканага чек ара кагылышуусунда жаракат алган 14 жаран түштү (сүрөт)

Бишкектеги Травматология жана ортопедия илим изилдөө борборуна чек ара чырынан жаракат алган жалпы 14 бейтап келип түштү. Бул тууралуу аталган оорукананын жетекчиси Сабырбек Жумабеков билдирди.

"Биз Баткенге 7 дарыгерди жөнөттүк. Калгандарыбыз бул жерден дарылоо иштерин улантып жатабыз. Түнкү саат 4тө алгачкы бейтап түшкөн. Ал эми таңкы саат 5:20да акыркы бейтап келип түштү. Баткенден жалпы 14 жаракат алган жаран түштү. Алардын ичинен жетөө аскер кызматкери, бирөө милиция кызматкери, калгандары жергиликтүү тургундар.

Баары эле октон жаракат алгандар. Абалдары орто оор. Өтө оор абалдагы бейтаптар Баткенде калышты. Жеринде биз жөнөткөн дарыгерлер операция жасап жатышат. Алардын абалы турукташканда Бишкекке алып келинет. Аял киши түшкөн жок, бизге көпчүлүгү жаштар түштү", - деди Травматология жана ортопедия илим изилдөө борборунун жетекчиси Сабырбек Жумабеков.