Кыргыз-Тажик чек арасындагы чырды жөнгө салуу боюнча жолугушуунун протоколуна кол коюлду

Кыргыз-Тажик чек арасындагы куралдуу чыр-чатакты ыкчам түрдө жөнгө салуу тапшырмасынын алкагында Кыргыз Республикасы менен Тажикстан Республикасынын тышкы саясий ведомстволорунун башчыларынын жумушчу жолугушуусу болуп өттү. Кыргыз өлкөсүнүн Орусиядагы элчилигинен билдиришкендей, жолугушуу учурунда тараптар ынак коңшулук мамилелер жана буга чейинки мамлекеттер аралык келишимдер менен макулдашуулардын негизинде төмөнкү маселелер боюнча өз ара макулдашышты.

1. Кыргыз Республикасынын Баткен облусу менен Тажикстан Республикасынын Согди облусунун чектеш аймактарында ок атышууну ушул жылдын 29-апрелинде Бишкек убактысы боюнча 19.30дан тартып (Дүйшөнбү убактысы боюнча ушул жылдын 29-апрелинде саат 18.30дан тартып) токтотуу;

2. Аскерлерди жана аскердик техниканы Баткен облусунун жана Согди облусунун чектеш аймактарынан туруктуу жайгашкан жерлерге алып кетүү;

3. Баткен облусу менен Тажикстандын Согди облусунун чектеш аймактарында абалды турукташтыруу боюнча сүйлөшүү процесстерин улантуу;

4. Эки элдин жана мамлекеттердин кызыкчылыгы үчүн белгиленген иш-чараларды ишке ашыруу жана тиешелүү турукташтырууга багытталган сүйлөшүү процесстерине жагымдуу шарттарды түзүү максатында эки өлкөнүн укук коргоо органдары менен аткаруу бийлигинин өкүлдөрүнөн турган биргелешкен жумушчу топ түзүү боюнча.

Жолугушуунун соңунда тараптар тийиштүү биргелешкен билдирүү кабыл алып, жолугушуунун протоколуна кол коюшту.