Интернет колдонуучу "Москвадан Баткенге техникалар жардамга жөнөтүлүп жатат" дейт. Башкы штабдын жообу

Интернет желесине Кыргыз-Тажик чек арасындагы куралдуу жаңжалдан улам Орусия Кыргыз өлкөсүнө жардамга кол сунду деген видео тарады. Тагыраагы, видеонун автору Москва шаарындагы танктардын жүрүшүн тартып, техника Кыргыз өлкөсүнө жардамга жөнөтүлүп жатканын айткан.

"Урматтуу кыргыз элим! Москвадан Кыргыз өлкөсүнө аскердик техникалар кыргыз желеги менен жардамга жөнөтүлүп жатат. 100дөй танк Баткенге кетип жатат. Күтүп алгыла, кыргыз элим!", - деген ал.

Бул боюнча Башкы штабдын басма сөз кызматына байланышканыбызда, социалдык тармактарда жайылып жаткан жогорудагы видео фейк экенин билдиришти.

"Бул видео маалымат калп. Мындай болушу мүмкүн эмес, бизге Москвадан эч кандай техника келбейт. Балким, 9-майга карата техникалык даярдык жүргүзүлүп жаткан болушу мүмкүн", - дешти мекеменин маалымат кызматынан.

Белгилей кетсек, Кыргыз өлкөсү менен Тажикстандын чек арасындагы абал 29-апрель күнү таңга маал курчуп кеткен.

Буга чейин эки өлкөнүн тышкы иштер министрлери саат 20:00дөн баштап ок атышпоо чечимин кабыл алгандыгы кабарланган.

Акыркы маалыматтарга ылайык, Коңшу Тажикстан менен болгон кагылышууда кыргыз тараптан жаракат алган адамдардын саны 134кө жетсе, 13 адам каза болду.