Социалдык тармакта "тажиктер кыргыздардын үйлөрүн басып алып, сүрдүрүп жатат" деген видео тарады

Социалдык тармакка бульдозер менен үйлөрдү сүрүп жаткан видео тарады. Аталган тасманы Урмат Насыкулов аттуу жаран Твиттер баракчасына жүктөп, "Бул видео Лейлек районунун Арка айылынан жөнөтүлдү. Андан тажиктер кыргыздардын имараттарын жана үйлөрүн бульдозер менен сүрүп жатышканын көрүүгө болот. Бул чек ара чатагыбы? Бул биздин мамлекетке кол салуу жана чет мамлекеттин аскердик баскынчылыгы", - деп жазган.

Ошондой эле Лейлек районунун Уланбек аттуу тургуну төмөндөгү видеону жөнөтүп, тажик тараптын социалдык тармактарынан алганын билдирди.

"Бул видеолорду көрсөңүздөр тажиктердин сүйлөп, тартып жатканын көрүүгө болот. Алар үйлөрдү сүрдүрүп, жерди ээлеп, чек араны жылдырып жатышат", - дейт жергиликтүү тургун.

Буга чейин ӨКМнын басма сөз кызматы Баткенде жалпысынан 21 үй, 1 мектеп, 10 май куюучу жай өрттөнгөнүн маалымдаган.