"Тийиштүү жардамдар көрсөтүлөт". Улукбек Марипов чек ара окуясында жакындарын жоготкондорго көңүл айтты

Премьер-министр Улукбек Марипов өкмөттүн жана жеке өзүнүн атынан Кыргыз-Тажик мамлекеттик чек ара тилкесиндеги акыркы окуялардын жүрүшүндө курман болгон мекендештерибиздин жакындарына жана туугандарына көңүл айтты.

"Кымбаттуу мекендештер, Баткен облусунда орун алган кайгылуу окуяларга байланыштуу терең кайгыруу менен көңүл айтам. Кыргыз-Тажик мамлекеттик чек арасындагы жарандардын жана наристелердин курмандыгына алып келген жаңжал кайгысы ар бир жарандын жүрөгүн жаралады. Жүздөгөн үй-бүлөгө кайгы алып келди. Эч кандай көңүл айтуулар менен жалп өчкөн мекендештерибиздин өмүрүн кайтарып ала албайбыз. Алардын элеси өлкөнүн ар бир жаранынын жүрөгүнүн түпкүрүндө сакталат!

Кыйын кезеңде бир муштумга түйүлүп, кагылышуу аймагында калган тургундарга көмөк көрсөткөн жарандарыбызга ыраазычылык билдиргим келет.

Конфликттин ырбоосуна жол бербөө үчүн колдон келген аракетин жасаган укук коргоо, күч түзүмдөрүнүн солдаттарына, сержанттарына жана офицерлерине ыраазычылык билдирем.

Курман болгон мекендештерибиздин жакындарына жана туугандарына терең кайгыруу менен көңүл айтам, ал эми жаракат алган жарандарыбыздын тез арада айыгып кетүүсүн жана чың ден соолукта болуп, узак жашоосун каалайм.

Мамлекет тараптан курман болгондордун жана жаракат алган жарандардын үй-бүлөсүнө тийиштүү жардамдар көрсөтүлөт. Зарыл болгон финансылык жана башка ресурстар талкаланган турак жайларды, социалдык жана чарбалык маанидеги объектилерди тезинен калыбына келтирүүгө багытталат.

Мекенибиз Кыргыз Республикасында ар дайым тынчтык, элибизде ажырагыс биримдик болсун".