Баткенде жабыр тарткан жарандар менен психологдор иштеп жатышат

Кыргыз-Тажик чек арасындагы куралдуу жаңжал учурунда жапа чеккендер менен психологдор жана психотерапевттер иштешүүдө. Бул тууралуу саламаттыкты сактоо жана социалдык өнүктүрүү министринин биринчи орун басары Ализа Солтонбекова маалымат жыйынында билдирди.

Анын айтымында, алар Бишкек шаарынан жана Ош облусунан Баткендеги чек арада жаңжал чыккан биринчи эле күнү жөнөп кетишкен.

"Алар ооруканада жаткандарга, эвакуацияланган үй-бүлөлөргө, бала бакчалардын жана мектептердин имараттарында убактылуу баш калкалап жаткандарга жеринде жардам көрсөтүп жатышат ", - деди ал.

Ализа Солтонбекова жабыркагандардын бардыгы мамлекет тарабынан кепилденген медициналык жардамды алаарын жана аларга керектүү нерселердин бардыгы өз убагында камсыздалып жаткандыгын белгиледи.

"Мындан тышкары жеке лабораториялар жана диагностикалык борборлор жардам беришет. Алар Бишкек шаарына жиберилген 56 жарандын бардыгына бекер анализ жана томография жүргүзөт", - деди Ализа Солтонбекова.