"Рахмон, Кыргыз өлкөсүнө кол салууну токтот...". Германиянын төрт шаарында мекендештердин катышуусунда митинг болуп өттү (сүрөт)

Баткен облусундагы Кыргыз-Тажик чек арасында чыккан чырдан улам ондогон жергиликтүү тургундардын өмүрү кыйылды. Алардын ичинен 5 жаштагы бала, 12 жаштагы Мадина аттуу кыз жаңжалдын курмандыгына кабылды. Орун алган кайгылуу жагдайлар ар бир кыргыздын жүрөгүн сыздатып турган чагы. Алыста жүргөн мекендештерибиз бул жагдайды көңүл сыртында калтырбай, Германиянын төрт шаарында митинг уюштурушту. Бул тууралуу SUPER.KG порталына Калыгул Жунушбеков билдирди.

"Биз Германиядагы мекендештер!

Баарыбыз көрүп тургандай, мамлекетибизде абал оор кырдалга туш болуп, күн сайын жоготуулар болду... Тажик аскерлери тынч жаткан кыргыз айылдарына кол салып, алардын күлүн көккө сапырып жатты. Биздин бийлик тынчтык жолу менен сүйлөшүүгө чакырып, макулдашканы менен чек арадагы айылдардын абалы оор болуп, баскынчылыкка дуушар болду. Тажик куралдуу күчтөрү артка тартмак турсун, улам бир айылды басып, тургундарды куугунтукка алышты. Бейкүнөө эл тоо таянып качып, 30 миңге чукул адам үй-жайын таштоого аргасыз болду. Бирок эл аралык маалымат каражаттарына бул жөнөкөй гана чек аралык конфликт катары берилип жатат. Ушул себептен эл аралык медианын жана коомчулуктун көңүлүн бурдуруу үчүн Берлин, Гамбург, Франкфурт, Мюнхен шаарларында Тажик элчилигинин алдында жана аянттарда тынчтык акциясына чыктык. Негизги ураан катары буларды колдондук: "Rahmon Stop Attacking Kyrgyzstan" (Рахмон, Кыргыз өлкөсүнө кол салууну токтот), "Stop killing civilians in Batken" (Баткендеги жергиликтүү тургундарды өлтүрүүнү токтоткула), "12 year old Madina and other dozens civilians killed in Kyrgyz-Tajik clash" (12 жаштагы Мадина жана ондогон жергиликтүү тургундар Кыргыз-Тажик кагылышуусунда курман болду).

Мындай акциялалар дүйнө коомчулугунун көңүлүн бурдуруу үчүн жана келечекте согушта болгон кылмыш иштерди эл аралык трибунада жоопко тартуу үчүн маанилүү", - дешти Германиядагы мекендештерибиз.

Германиянын Берлин шаары