Ошто тажик тараптын кол салуусунан курман болгондорго арналып куран окулду

Ош шаарынын борбордук аянтында тажик тараптын кол салуусунан курман болгондорго арналып куран окулду. Бул тууралуу шаардык мэриянын маалымат кызматынан билдиришти.

Билдирүүгө ылайык, иш-чарага Аалымдар кеңешинин төрагасы Абдышүкүр Нарматов, вице-мэр Эмил Шадыханов, Ош шаарынын казысы Убайдулла Сарыбаев жана шаар тургундары катышты.

"Иш-чара Элдик штаб тарабынан уюштурулду. Куран окутулгандан кийин ысык тамак берилди", - деп жазылат маалыматта.

Эске салсак, 29-апрелде Кыргыз-Тажик чек арасында чыр күчөп, ал тажик тараптын агрессивдүү ок атуу, үйлөрдү өрттөөсү менен уланган. Анын кесепетинен, Кыргыз өлкөсүнүн расмий маалыматтары боюнча, 35 жаран каза болуп, 200гө жакын адам жаракат алды. Учурда Өзгөчө кырдаалдар министрлиги чырдан улам келтирилген чыгымдар такталып жатканын маалымдаган.