Тажик тараптын кол салуусунан жабыркаган Баткендеги элге учурда курулуш материалдары керектиги айтылды

Бүгүн, 4-май күнү Баткен облусунун элине жардам көрсөтүү боюнча Башкы республикалык штабдын жүргүзүп жаткан иштери жөнүндө маалымат жыйын өтүүдө. Анда штабдын өкүлдөрү Ашырбай Жусупбеков, Нуржан Абылкасымов катышууда.

"Азыркы учурда тажик тараптын кол салуусунан жабыркаган Баткен аймагындагы элге курулуш материалдары керек. Башка тамак-аш, дары-дармек каражаттары жетиштүү деңгээлде чогулуп, жер-жерлерге жеткирилип жатат", - деди Ашырбай Жусупбеков.

Эске салсак, 29-апрелде Кыргыз-Тажик чек арасында чыр күчөп, ал тажик тараптын агрессивдүү ок атуу, үйлөрдү өрттөөсү менен уланган. Анын кесепетинен, Кыргыз өлкөсүнүн расмий маалыматтары боюнча, 35 жаран каза болуп, 200гө жакын адам жаракат алды. Учурда Өзгөчө кырдаалдар министрлиги чырдан улам келтирилген чыгымдар такталып жатканын маалымдаган.