Садыр Жапаров Жеңиш күнүн белгилөө үчүн Москвага барбайт. Анын себебин маалымат катчы түшүндүрдү

Президент Садыр Жапаров Улуу Жеңиш күнүн белгилөө үчүн Москвага барбай турганы буга чейин маалымдалган.

Бул маалымат азыркы тапта дагы интернет желелеринде кызуу талкууланууда. SUPER.KG порталы президенттин маалымат катчысы Галина Байтеректен Садыр Жапаров эмне себептен Москвага барбай турганын сурап, төмөнкүдөй жооп алды.

Маалымат катчынын айтымында, Жапаров пандемиядан улам 9-майга карата Москвага барууну өзү деле пландаган эмес. Ал эми интернет колдонуучуларынын тынчсыздануусуна олуттуу себеп деле жок.

"Орусия быйыл Жеңиш күнүн юбилейлик маанайда белгилебегендиктен, КМШнын лидерлери расмий түрдө иш-чарага чакырылган эмес. Мунун себеби катары Орусиянын президенти Владимир Путиндин басма сөз катчысы Дмитрий Песков пандемияга байланыштуу экенин айтып, түшүндүрдү.

Ал эми Тажикстандын президенти Эмомали Рахмондун Москвага болгон сапары бир ай мурун эле макулдашылган. Мындай расмий жолугушуулар 2-3-күн калганда эмес, бир ай мурун макулдашылат, алардын сүйлөшүүсү пландалганда чек арада чыр чыга элек болчу”, - деди Байтерек.