Эне тилге эки мүнөт: "Эшик жыртуу", "Котур ташы койнунда" фразеологизмдеринин мааниси

"Эне тилге эки мүнөт" рубрикасынын бул жолку чыгарылышында "эшик жыртуу", "котур ташы койнунда", "колтугуна суу бүркүү" фразеологизмдеринин маанисине көңүл бурабыз. Эл арасында аталган сөз айкаштары айтылганы менен, көпчүлүк маанисин биле бербейт эмеспи. Жогорудагы фразеологизмдердин маанисин кыргыз тили жана адабияты мугалими Нурислам Эргешалиев айтып берди.

Эшик жыртуу - Тынымсыз келе берүү, тындырбоо, кайра-кайра кирип-чыга берип тажатуу. Мисалы: "Түн жамынып эшик жырткан жарамазанчы болуптур дедирип, элге-журтка кеп кылмаксың го" (Качкынбай Осмоналиев).

Котур ташы койнунда - Жаман ойлуу, ичи арам, бирөөгө жамандык кылайын деген ниети, бузукулук ою бар. Мисалы: "О, наадан десе, кантер экен деп тим койсо, кылтыйып котур ташы койнунда турбайбы" (Насирдин Байтемиров).

Колтугуна суу бүркүү - Бирөөгө каршы көкүтүү, астыртан тукуруп, шилтеп коюу. Мисалы: "Караңгы кишилерди көкүтүп, колтугуна суу бүркөт" (Зыяш Бектенов).