Депутат Мамашова: "Конституцияга кол коюу аземине бардык өкмөт мүчөлөрү келип, бүгүн чек ара маселесин талкуулаганга эч ким келе албайбы?"

Бүгүн, 6-майда Жогорку Кеңеште Баткендеги чек ара чыры боюнча маселени кароону күн тартибине киргизүү сунушталды.

Өкмөттүн Жогорку Кеңештеги өкүлү Алмасбек Абытов бул маселени башка күнгө жылдырууну сунуштады. Өкмөт мүчөлөрү Баткенде жүрүшкөнүн айтты.

Депутат Айсулуу Мамашова: "Сиздерге чоң таарынычым менен кайгыруумду айткым келет. Эмне үчүн кечээ Конституцияга кол коюу аземине бардыгы келди? Баткенде болгон окуя анча маанилүү эмеспи? Жыйынтыгын чыгаруу керек. Жоопкерчиликти бирөө алышы зарыл. Элди сыйлагыла. Элди сыйлабагандын түбү ушул болуп жатат. Кайсы жетекчилер бар болсо ошолор келсин. Талкуулайлы", - деди.

Өкмөттүн өкүлү: "Биз дагы Баткенде эмне болуп жатканын билебиз. Өкмөттүн мүчөлөрүнүн бардыгы ошол жакта. Мен ал маселени көтөргөн жокмун", - деди.