Жарандык активист Жеңиш Молдокматов ИИМге сурак берип чыкты

Бүгүн, 6-майда жарандык активист Жеңиш Молдокматов Ички иштер министрлигине сурак берип чыкты. Эмне себептен суракка чакырылгандыгы тууралуу ал өзүнүн социалдык тармактардагы баракчасына жарыялап, октябрь окуялары боюнча козголгон кылмыш ишинин алкагында Садыр Жапаров, Камчыбек Ташиев жана ошого катышкан бардык тараптар суралышы керектигин билдирди.

"Суракка бир иш боюнча 10:00дө кирип 13:30да чыктым. Негизинен Ички иштер министрлигинин тергөө кызматында эки иш боюнча күбө катарындамын. Биринчиси 5-6-октябрь боюнча. Азыр тергөө бүттү, тийиштүү протоколдорго кол коюп чыктым. Ал эми бүгүн кечинде дагы 9-октябрь боюнча козголгон кылмыш ишинин алкагында күбө катары суралам. Жалпы октябрь окуялары боюнча тергөөдө көрсөткөн көрсөтмөлөрүм жана жалпы элге да кайрылуум бар.

Бул октябрь боюнча козголгон кылмыш ишинин алкагында Садыр Жапаров, Камчыбек Ташиев жана ошого катышкан бардык тараптар суралышы керек. Мына ошондо адилеттүү тергөө болот деп айта алам. Ал болмоюнча бул тергөө дагы, сотко өткөн иш дагы адилетсиз болот. Экинчиден бүгүнкү күнгө чейин ушул иштин эң негизги күнөөкөрлөрү суракка чакырылган жок. Аларга карата иш козголгон жок. Алар Опумбаев, Жунушалиев жана башка тийиштүү тараптар. Ушунун бардыгына иш козголуп, бардыгы бирдей суракка алынышы керек", - деди Молдокматов.