Мамлекет жетекчилери коомдук ишмер, меценат Ташкул Керексизовду эскеришти

Мамлекет жетекчилери коомдук ишмер, меценат Ташкул Керексизовду эскеришти. Бул тууралуу президенттик аппараттын басма сөз кызматынан билдиришти.

7-майда 73 жаш курагында узакка созулган оорудан кийин Кыргыз Республикасынын мамлекеттик жана коомдук ишмери, меценат Ташкул Керексизов дүйнө салды.

Ташкул Керексизов Чолпон-Атадагы "Рух-Ордо" жана "Аалам ордо" комплексинин негиздөөчүсү. Аталган комплекстер кыргыздын улуттук рухун көтөрүп, сыймык жаратуучу уникалдуу маданий объектке айланган.

Ташкул Керексизов 1948-жылы Ысык-Көлдүн Балыкчы шаарында туулган. 1972-жылы Кыргыз мамлекеттик университетин, 1981-жылы Алматыдагы жогорку партиялык мектепти аяктаган. 1972-1977-жылдары Кыргыз керек-жарак союзунун аппаратында товаровед, 1980-1982-жылдары Панфилов райондук керек-жарак союзунун төрагасы, 1990-1992-жылдары Москва райондук керек-жарак союзунун төрагасы болуп, 1996-жылы Кыргызстан Кооперативдер бирдигин жетектеген. 1996-1998-жылдары Талас облусунун губернатору, Салык кызматынын директору болгон. 1999-2000-жылдары Кыргыз Республикасынын министри-мамлекеттик мүлк фондусунун жетекчиси болуп иштеп бир катар жогорку мамлекеттик кызматтарда эмгектенген.

2005-жылы үчүнчү чакырылыштагы Жогорку Кеңештин депутаты болуп шайланган.

Кыргыз элинин чыгаан уулу, коомчулукта, эл аралык деңгээлде өзүнүн кайталангыс эмгеги менен элдин калың катмарына таанымал болгон атактуу ишмер Ташкул Керексизовдун жаркын элеси кыргыз элинде түбөлүк сакталат.