Садыр Жапаровду жана кыргыз элин чет элдик лидерлер Жеңиш күнү менен куттукташты

Президент Садыр Жапаровду жана кыргыз элин чет элдик лидерлер Жеңиш күнү менен куттукташты. Бул тууралуу президенттик аппараттын басма сөз кызматынан билдиришти.

Казакстандын президенти Касым-Жомарт Токаев: "Бул ыйык күндө биз келечек муундун бейпил жашоосу үчүн согуш талааларында жана тылда жан аябай салгылашып отуруп фашизмди жеңген ата-бабаларыбыздын теңдешсиз эрдигин өзгөчө сыймыктануу, ыраазычылык сезимдер менен белгилейбиз. Бузулбас достуктун, бир боордоштуктун жана өз ара колдоонун эчактан бери келаткан салттары мындан ары да Казакстан менен Кыргыз өлкөсүнүн ортосундагы ынак коңшулукту жана стратегиялык өнөктөштүктү чыңдоого бекем негиз болуп кызмат кыла берерине ишенем", - деп айтылат куттуктоодо.

"Биздин жогорку деңгээлдеги диалогубуз жана ортобузда жетишилген макулдашууларды толугу менен жүзөгө ашыруу түбөлүк достукка, ынак коңшулукка жана стратегиялык өнөктөштүккө негизделген эки тараптуу мамилелерди мындан ары тереңдетүүгө кызмат кылат деп ишенем", - деп айтылат Өзбекстандын президенти Шавкат Мирзийоевдин куттуктоосунда.

Түркмөнстандын президенти Гурбангулы Бердымухамедов Садыр Жапаровго жана Кыргыз жарандарынын бардык ардагерлерине чың ден соолук, күч-кубат, бакыт-таалай, ал эми боордош кыргыз элине тынчтык, бакубатчылык жана өнүгүү каалады.

Сауд Арабия королу Салман бин Абдулазиз Аль Сауд: "Жеңиш күнүнүн майрамына карата биз чын жүрөктөн чыккан куттуктоолорубузду жана ден соолук, бакыт-таалай каалаган тилектерибизди жолдойбуз. Ал эми өкмөткө жана кыргыз элине мындан аркы өсүп-өнүгүүлөрдү каалайбыз", - деп айтылат куттуктоо телеграммасында.

Буга чейин Орусиянын президенти Владимир Путин жана Тажикстандын президенти Эмомали Рахмон куттуктоосу жарыяланган.