Бишкекте кургак учук жуктурган жоокерлердин саны 33кө жетти

Аскерде кызмат өтөп жатып, кургак учук жуктуруп алган жоокерлердин саны 33кө жетти. Бул тууралуу SUPER.KG порталына Бишкек шаардык кургак учукка каршы оорукананын башкы дарыгери Тамара Баялиева билдирди.

Анын айтымында, буга чейин дарыланып жаткан жоокерлердин төртөө ооруканадан чыгарылып, аскер госпиталында дарылануусун улантууда.

"Ооруканага буга чейин келип түшкөн жоокерлер дарылануусун улантууда. Жакында дагы 2 аскерди ооруканадан чыгаруу пландалып жатат. Кургак учукту дарылоо курсу 6 айдан 8 айга чейин", - деп билдирди ал.

Эске салсак, буга чейин январь айында Коргоо министрлигинин ыкчам кызматынын 7 жоокери кургак учук оорусун жуктуруп алышканы кабарланган.

Соңку маалыматтарга ылайык, кургак учук жуктурган аскерлердин саны өсүп отуруп 22ге жеткен.

Кийин аскер прокуратурасы жоокерлердин массалык түрдө кургак учук оорусуна кабылышы боюнча кылмыш ишин козгогон. Бул факты Кылмыштардын жана жоруктардын бирдиктүү реестрине "шалаакылык" беренеси менен катталып, сотко чейинки өндүрүш иши башталган.