Таласта кечээ дайынсыз болуп жоголгон өспүрүм аман-эсен табылды

Талас облусунда 15 жаштагы өспүрүм аман-эсен табылды. Бул тууралуу облустук милициядан билдиришти.

Билдирүүгө ылайык, кечээ 9-май күнү болжол менен түнкү саат 02:00 чамасында Талас РИИБинин нөөмөт бөлүмүнө Көк-Ой айылынын тургуну 15 жаштагы баласы белгисиз себептер менен дайынсыз болуп жок болуп жатканын айтып кайрылган.

Билдирүү маалыматты эсепке алуу журналына катталып, анын негизинде РИИБдин ыкчам тергөө тобу жана өздүк курамы ошол замат чыгып издөө жана иликтөө иштерин жүргүзүшкөн. Милиция кызматкерлери бир нече топторго бөлүнүп, кызматтык күч каражаттарды жумшоо менен айылдын ичин жана Талас токоюн толугу менен издөөгө алышкан.

Көп узабай, тактап айтканда, түнкү саат 06:30 чамасында өспүрүмдөр менен иштөө бөлүмүнүн кызматкерлери тарабынан өспүрүм аман-эсен табылып, ата-энесине тапшырылган.

Аталган факты боюнча текшерүү башталды.