2020-жылы коммерциялык банктардын кирешелери мурунку жылдын көлөмүнө салыштырмалуу 9,2 пайызга көбөйдү

2020-жылы коммерциялык банктардын кирешелери мурунку жылдын көлөмүнө салыштырмалуу 9,2 пайызга көбөйдү. Бул тууралуу Улуттук статистикалык комитетинен билдиришти.

Кыргыз мамлекетинде жыл сайын 10-майда банк системасынын кызматкерлери өзүнүн кесиптик майрамын белгилешет.

Азыркы убакта республиканын банк системасында Улуттук банк жана 23 коммерциялык банк, алардын 16сы - чет өлкөлүк капиталдын катышуусу менен иш жүргүзөт. Республиканын региондорунда алардын 300дөн ашык филиалы иштейт. Банк сегментинде иштеген кызматкерлердин саны 16,5 миңден ашык адамды түзөт, ал эми банктардын кардарларынын эсептеринин саны - 4 миллиондон ашыкты түзөт. 2020-жылы финансылык ортомчулук чөйрөсүндөгү кызматкерлердин орточо эмгек акысы мурунку жылдын деңгээлинде сакталуу менен 38 миң сомду түздү.

2020-жылы коммерциялык банктардын кирешелери мурунку жылдын көлөмүнө салыштырмалуу 9,2 пайызга көбөйүп, 32 миллиард 600 миң сомду түздү, ал эми чыгымдары ушул эле мезгил ичинде 30 миллиард сом өлчөмүндө түзүлдү, бул 12,8 пайызга көп.

2020-жылдын жыйынтыктары боюнча, 22 банк пайда алышты, ал эми бир банк чыгым тартты. Сальдолоштурулган финансылык жыйынтык 2 миллиард 600 миң сом пайданы түздү, бул 2019-жылга караганда 20,3 пайызга аз.

2020-жылдын аягына карата коммерциялык банктардын суммардык активдери бир жылдын ичинде дээрлик 17 пайызга көбөйүп, 288 миллиард 700 миң сомду түздү.

Коммерциялык банктардын ачык кредиттик портфели 2019-жылдагы анын көлөмүнө салыштырмалуу 10,5 пайызга көбөйдү жана 2020-жылдын аягына карата 162 миллиард 800 миң сомду түздү. Кредиттөөнүн негизги багыттары болуп соода чөйрөсү, айыл чарба, ипотека жана керектөө муктаждыктары саналды.