Түркмөнстандын тышкы иштер министри чек арадагы абалды чечүү үчүн кыргыз тарап кабыл алган чечимдерди кубаттады

11-майда Кытай Эл Республикасынын Сиань шаарында өтүп жаткан «Борбордук-Азия - Кытай» тышкы иштер министрлеринин экинчи кеңешмесинин «аянтчасында» Кыргыз Республикасынын тышкы иштер министри Руслан Казакбаев Түркмөнстандын министрлер кабинетинин төрагасынын орун басары, тышкы иштер министри Рашид Мередов менен жолугушту.

Анда Казакбаев түркмөн кесиптешин 28-30-апрелинде Кыргыз-Тажик чек арасында көптөгөн адамдардын, анын ичинде жөнөкөй жарандардын арасында курмандыктарына алып келген окуялар, ошондой эле Баткен облусундагы азыркы абал жана Кыргыз өлкөсүнүн калктуу конуштарынын инфратүзүмдөрүн калыбына келтирүү боюнча көрүлүп жаткан чаралар жөнүндө маалымдаган. Бул тууралуу мекеменин маалымат кызматы кабарлады.

Сүйлөшүүдө Мередов жаңжалдуу абалды чечүү үчүн кыргыз тарабы кабыл алган чараларды кубаттаган жана Казакбаевдин талаш-тартыштарды саясий-дипломатиялык ыкмалар гана менен чечүүнүн зарылчыгылы жөнүндө пикирин колдогон.

"Эки өлкөнүн тышкы саясий ведомстволорунун башчылары тарабынан жогорку деңгээлде иш-сапарларды даярдоо, ошондой эле регионалдык экономикалык долбоорлорду ишке ашыруу маселелери талкууланды.
Ооганстандын тынчтыкты куруу жана БУУнун алкагында көп тараптуу форматта кызматташуу маселелери боюнча конструктивдүү пикир алмашуу болду.

Жолугушуунун жүрүшүндө Кыргыз өлкөсү менен Түркмөнстандын тышкы иштер министрлери отун-энергетика, соода-экономикалык жана маданий-гуманитардык чөйрөлөрдөгү кыргыз-түркмөн өз ара аракеттенүүсүнүн актуалдуу маселелерин талкуулашты", - деп айтылат маалыматта.