"Евро-2020": Ильзат Ахметов Орусия курамасына чакырылган жок

Башкы машыктыруучу Станислав Черчесов баштаган футбол боюнча Орусия курама командасынын машыктыруучулар штабы "Евро-2020" турнирине даярданууга чакырыла турган оюнчулардын тизмесин жарыялады. Бул тууралуу аталган өлкөнүн басылмалары жазды.

Учурда чакырыла турчу 30 футболчунун тизмеси жарыяланган. Алардын ичине Кырыз өлкөсүндө төрөлгөн Ильзат Ахметов кирген эмес. Акыркы тизмеге 26 оюнчу кирет.

Ошол эле учурда курамга кириши мүмкүн болгон 7 футболчунун тизмеси дагы жарыяланган. Тилекке каршы, алардын арасында дагы Ахметов жок.

Футбол боюнча Европа чемпиондугу 2020-жылдын жайында өтүшү керек болчу. Бирок коронавирус пандемиясынын улам 2021-жылга жылдырылган. Турнир учурда Европанын 12 шаарында өтүшү керек экендиги белгилүү. Бирок УЕФА уюму эпидемиологиялык кырдаалга байланыштуу алардын саны азайышы мүмкүн экендигин жарыялаган.