Салык декларациясын өз убагында тапшырбаган кызматкерлердин тизмеси жарыяланды

Мамлекеттик салык кызматы 2019-2020-жылдары үчүн бирдиктүү салык декларациясын тапшырбаган мамлекеттик жана муниципалдык кызматкерлер тууралуу маалымат жарыялады.

Ага ылайык, декларацияны өз убагында тапшырбагандардын жалпы санынын көпчүлүгү муниципалдык жана жергиликтүү бийлик органдарынын кызматкерлери жана адистери болду. Бардыгы – 227 декларант.

"Тизмеде Ички иштер министрлигинин - 56, Коргоо иштери боюнча мамлекеттик комитетинин - 33, Мамлекеттик чек ара кызматынын - 30, Жогорку Соттун - 27, Мамлекеттик каттоо кызматынын - 21, Жазаларды аткаруу мамлекеттик кызматынын - 17, Экономикалык кылмыштарга каршы күрөшүү боюнча мамлекеттик кызматынын - 13, Финансы министрлигинин - 12, Курчап турган чөйрөнү коргоо жана токой чарбасы мамлекеттик агенттигинин - 11, Айыл чарба, тамак-аш өнөр жайы жана мелиорация министрлигинин - 10, Мамлекеттик кадр кызматынын - 9, Мамлекеттик салык кызматынын - 9, Ветеринардык жана фитосанитардык коопсуздук боюнча мамлекеттик инспекциясынын - 8, Жогорку Кеңештин - 8, Эмгек жана социалдык өнүктүрүү министрлигинин - 7, Өкмөт аппаратынын - 7, Эсептөө палатасынын - 6, Саламаттыкты сактоо министрлигинин - 6, Тышкы иштер министрлигинин - 6, Билим берүү жана илим министрлигинин - 5 жана башка органдардын кызматкерлери да бар", - деп жазылат маалыматта.

Ошондой эле декларацияны өз убагында же таптакыр тапшырбаган мамлекеттик жана муниципалдык кызматкерлердин тизмеси юридикалык баа берүү үчүн прокуратура органдарына өткөрүлүп берилерин кошумчалашкан.

Эскерте кетсек, мамлекеттик жана муниципалдык кызматкерлердин салык декларациясын тапшыруу мөөнөтү жыл сайын 1-апрелде аяктайт.