"Балам кылмыш жасабаса эмнеге кармалышы керек?. Велосипедди жетелеп өтүш керек". Иса Өмүркулов уулу катышкан жол кырсыгы тууралуу үн катты

Депутат Иса Өмүркулов уулу Азамат Исаев катышкан жол кырсыгы тууралуу үн катты. Эл өкүлү кырсык боюнча уулуна эч кимдин доосу жок экенин SUPER.KG порталына айтып берди.

"Кудай сактасын, уулум наркоман эмес. Бул жөнөкөй эле окуя. Каршы тилкедеги унааларды өткөрүп, жол чырактан бурулуп жатканда велосипедчен кыз өтүп баратыптыр. Эреже боюнча велосипедди жетелеп өтүш керек. Балам бурулганда тиги кыз келип велосипеди менен унаанын капталына урунуп калыптыр. Болгону ушул.

Балам кылмыш жасабаса эмнеге кармалышы керек? Бул жол кырсыгы. Чечиле турган маселе жок, тема жабылган. Эч кимдин бизде доосу жок", - деди Өмүркулов.

Буга чейин Иса Өмүркуловдун уулу велосипедчен жүргүнчүнү сүзүп кетти деген маалымат тараган.

2011-жылы Бишкек-Торугарт унаа жолунан ал кездеги Бишкек шаарынын мэри Иса Өмүркуловдун уулу Азамат Исаев жол тандабас унаасы менен каршылаш тилкеге чыгып, Ауди үлгүсүндөгү унааны сүзгөн. Кырсыктан 3 адам каза таап, факт боюнча Кылмыш-жаза кодексинин 281-беренеси менен кылмыш иши ачылып, акырында экс-мэрдин уулу шарттуу түрдө 7 жылга кесилген.