Баткендин Кара-Токой айылына жаңы ФАПтын курулушу башталды

Баткен районунун Суу-Башы айыл өкмөтүнүн Кара-Токой айылында жаңы ФАПтын имаратына капсула салынды. Бул тууралуу өкмөттүн Баткен облусундагы ыйгарым укуктуу өкүлүнүн басма сөз кызматынан билдиришти.

Билдирүүгө ылайык, иш-чарага өкмөттүн Баткен облусундагы ыйгарым укуктуу өкүлү Абдикарим Алимбаев, Баткен районунун акими Учкунбек Жоробаев жана жергиликтүү тургундар катышты.

"ФАПтын жаңы имаратынын курулушу менен анын базасында стоматология, аялдардын гинекология бөлүмү, жугуштуу оорулар бөлүмү, жүрөк дартын кароо бөлүмү жана жалпы имаратты жылытуучу система орнотулуп, заманбап медициналык жабдыктар менен камсыздоо каралган.

Жалпы сметалык баасы 2 миллион 800 миң сом болгон курулушту "Ассанабил" кайрымдуулук фонду каржылоого алууда", - деп жазылат мекеменин маалыматында.

Белгилей кетсек, Кара-Токой айылындагы 1000ден ашуун калкты тейлеген ФАПтын имараты 1962-жылы СССР мезгилинде курулуп, эскилиги жетип, жаңы имарат куруу зарылчылыгы жаралган болчу.

Кара-Токой айылы Өзбекстандын Сох районунун айылдары менен чектешет.