"Үйдөн качып атасына кетип калчу". Чүйдө изделип жаткан 15 жашар бала эки айдан бери табыла элек

Буга чейин Чүй облусунун Панфилов районунда 2006-жылы туулган Адилет Данияров аттуу бала дайынсыз болуп изделип жатканы кабарланган. Ал бүгүнкү күнгө чейин табыла элек. Бул тууралуу Чүй ОИИББинин маалымат кызматынан билдиришти.

SUPER.KG порталы аталган өспүрүмдүн апасына байланышканда, төмөнкүлөрдү билдирди.

"Баламан бүгүнкү күнгө чейин такыр дайын жок, байланышка дагы чыккан жок. Нарын облусунун Ат-Башы районунда атасы бар. Ажырашканыбызга 10 жылдан ашты. Негизи үйдөн качканда атасына кетип калчу. Бул жолу ал жакка барбаптыр. Мен экинчи жолу турмушка чыкканы балам атасы экөөбүздүн ортодо эле жүрчү. Бир ай меникинде, кайра атасыныкына жүрүп келчү. Атасынын дагы үй-бүлөсү бар. Менин биринчи турмушумдан 2 балам, экинчи турмушумдан 1 кызым бар. Учурда Чүйдө жашайм", - деп билдирди апасы.

Окуянын чоо-жайы:

8-апрель күнү Панфилов райондук милициясына 1985-жылы туулган келин арыз менен кайрылып, 15 жаштагы баласы 20-февралда Кум-Арык айылындагы үйдөн чыгып кеткен бойдон кайрылып келбегенин жазган.

Бул факты Кылмыштардын жана жоруктардын бирдиктүү реестрине катталып, издөө иштери башталган.

Арыз ээси менен сүйлөшүү учурунда өспүрүм бала Ысык-Көл облусунда туулуп өскөнү белгилүү болгон. Апасынын айтымында, ал 5-класстан баштап мектепке барбай, үйдөн кача баштаган. Кийинчерээк жумалап же айлап жоголуп кеткенин билдирген. Ушул себептүү апасы арызды убагында жазган эмес.

Белгилери: Бою 160-165 сантиметр, чачы кара, арык чырай, башынын сол жагында тырык бар.