Чек ара чырында жарым-жартылай укпай калган беш жашар Айжаз туулгандыгы тууралуу күбөлүгүн алды

Бүгүн, 17-майда Мамлекеттик каттоо кызматынын калкты каттоо департаментинин кызматкерлери Жаңылай Мурзаевага беш жашар кызы Айжаз Мурзаеванын туулгандыгы тууралуу күбөлүгүн тапшырышты. Бул тууралуу аталган департаменттен билдиришти.

Маалым болгондой, чек ара жаңжалы учурунда Айжаз Мурзаеванын документи күйүп кетен. Учурда кыз Эне жана баланы коргоо улуттук борборунда дарылануудан өтүп жатат. Ал жаңжал учурунда катуу чочуп кетип, мындан улам жарым-жартылай укпай калган.

Мурзаевдердин үй-бүлөсү Баткен облусунун Лейлек районунун Интернационал айылында жашайт. Ошол күнү, 29-апрелде, Айжаз көчөдө башка балдар менен ойноп жүргөн. Тажик тараптын кол салуусу Мурзаевдердин үй-бүлөсүн күтүлбөгөн жерден башка айылга качып кетүүгө аргасыз кылган. Алар Сүлүктүгө туугандарынын үйүнө келишкен. Айжаз кулагы ооруп жаткандыгын айткан. Алгачкы экспертизадан кийин кыз менен эне Бишкекке жөнөтүлгөн. Дарыгерлер Айжаздын угуусу калыбына келе баштаганын билдиришти. Жарым-жартылай укпай калуусу жана кулактын оорушу - бул катуу чочугандан болгон.